Riaan & Lientjie Venter

Die #virAltydVenter troue was op 22 Mei 2021 op Mariendal Venue buite Kroonstad in die Vrystaat. Van die begin af was die tema van die troue elegant en ANDERS. Ons het gekies om op die plaas in die Vrystaat vlaktes te gaan trou, omdat ons nie by ‘n venue wou trou waar elke troue min of meer dieselfde was en jy ‘n plaas se prys daarvoor betaal nie. Dit was ons inspirasie, ons wou anders wees. Ons het meeste van die reëlings self getref en amper almal wat betrokke was by die troue was plaaslike mense wat Lientjie al ken vandat sy ‘n klein dogtertjie was. Vir ons was dit belangrik om te fokus op dinge wat vir ons kosbaar is en nie die dinge wat normaalweg in ‘n trou venue se pakket ingesluit is nie. Dit het ingesluit goeie kos, goeie wyn, goeie koffie, goeie musiek en ‘n sprokiesmooi saal. Ons troue se kleure was wit, salie groen, hout, glas en soveel as moontlik liggies. Ons kleredrag was elegant en formeel, aangesien so baie dinge in ons huidige lewe al hoe meer “plain” word, daarom het ons besluit om groot te gaan.

Ons het in ‘n buite kerkie getrou waar ‘n mens oor die Vrystaat vlaktes kon uitkyk. Die troukar was ‘n wit Volkswagen Volla wat aan Riaan se oorlede Oupa behoort het en so was hy ook deel van ons dag. Ons konfetti was gedroogde Knoppiesdoring blare al die pad van ons Bosveld plaas, sodat ons bietjie van die Bosveld op ons troue kon hê en die mandjie waarin dit was is dieselfde konfetti mandjie wat Lientjie se ouers op hulle troue gebruik het. Die Dominee se preek het ingesluit hoe sout en peper altyd saam gebruik word, nie een sonder die ander een nie. Met daardie gedagte het die bruidspaar ‘n sout en peper pot aanmekaar vasgeplak om so ewig trou aan mekaar te beloof en om nooit sonder mekaar te wees nie.

Ons het ‘n buite straatkafee voorgereg gehad met onder andere ‘n garnaal kaaskoek, broodgateau en gekleurde groentechips. Die drankstasies het bestaan uit gluhwein, witwyn, sap en gin met droё ys. Ons het ook die troukoek buite gesny wat gebak was deur my Tannie en dit was een van die 1ste troukoeke wat ek ooit gesien het wat die gaste op eet. Toe almal in die saal sit was ‘n palletvervrisser macaroon met sorbet op droë ys bedien en daarna was dit tyd vir die hoofgereg. Die hoofgereg was bord bediening met onder andere filet met Pinotage Jus en Romanoff Aartappelwiele. Elke kossoort op die bord kon met ‘n sekere wyn gepaar word om mekaar te komplementeer. Ons hoof fokuspunt in die saal was die poeding tafel wat in die middel van die saal was met baie ligte en kerse en daar was alles op waaraan ‘n mens kan dink. Dit het begin by sjokolade toffie appels, fudge van geelsuiker, tuisgemaakte malvalekkertoebroodjies tot miniatuur crème brûlée. Ons het ‘n koffie stasie gehad met ‘n barista en daar was meel op die vloer gegooi toe ons begin dans.

Ons het 4 blommemeisies, 3 hofknapies, 5 strooimeisies en 4 strooijonkers gehad. Ons trou geskenkies, asook die tafel aanwysings was ‘n foto van elke gas wat deur Riaan se boetie van 16 jaar geteken is en ons het ‘n spesiale tafel vir die blommemeisies en hofknapies gehad met goedjies wat hulle besig kon hou. Hulle het ons dag baie spesiaal gemaak en dit was lekker om so baie mense wat vir ons spesiaal is deel van ons troue te hê.

Ons het die dansbaan sommer voor hoofgereg oop gemaak sodat die mense kon begin kuier en terwyl ons op Elton John se “Can you feel the love tonight” gedans het, het ons gaste om ons gestaan met “sparkles” en dit was so spesiaal. Ons musiek was gemaak deur The Morning After Band en dit het verseker die troue ‘n baie lekker gees help gee.

Ons troue was op die plaas, maar nie ‘n plaastroue nie. Dit was elegant, tydloos en absoluut die troue waaroor ons al twee gedroom het. Ons troue het uit baie hoogtepunte bestaan, ons 1ste dans tussen ons gaste wat “sparkles” vashou, die dramatiese aankoms met die wit Volla, die kos, ons wonderlike gaste, die pragtige trou rok, Riaan se ongelooflike mooi toespraak, die wonderlike manier waarop almal wat betrokke was by die troue ons hanteer het en ons dag spesiaal gemaak het, die Pa en dogter dans, die intimiteit en stilte van die boskerkie, ons ongelooflike troudiens deur ons Dominee, die rit saam met Lientjie se Pappa kerkie toe vir die laaste keer as sy ongetroude dogter , maar daar is een hoogtepunt wat verseker uitstaan. Die hoogtepunt van die #virAltydVenter troue was die oomblik toe Lientjie, ingehaak by haar Pappa, in die kerkie instap en Riaan staan voor in die kerk met trane in sy oë en ons weet almal is hier vir ONS! Dit was die ongelooflikste gevoel wat ons nog ooit ervaar het nie en ons kon net sê DANKIE. Ons troudag was alles waaroor ons nog ooit gedroom het.