Marko & René Erasmus - Troue van die Jaar

STORIE:

Ons spesiale, intieme dag was werklik ’n droom wat waar geword het! Ons het vinnig op ’n venue besluit, en dit was presies wat ons in gedagte gehad het – Intiem Weddings, geleë op die koppie van die pragtige Magaliesberge. Ons het ons beloftes aan mekaar gemaak onder ’n majestueuse ou vyeboom. Interessant genoeg is die eienaar van die venue ook met die naam René geseën, wat dit vir ons ekstra spesiaal laat voel het – asof dit bestem was.

Ek het aanvanklik gedink ek sou sukkel om op ’n trourok te besluit, maar inspirasie het vinnig gekom. Ek het my idee na die ongelooflike Ciska Barnard geneem, en sy het my droomrok presies soos ek dit voorgestel het, tot lewe gebring. Omdat Marko ’n bietjie korter as ek is, het ek besluit om op die dag eenvoudige plat sandale te dra – perfek gemaklik én stylvol. Marko se troupak, in ’n natuurlike beige kleur, het hom pragtig gestaan en pas by ons aardse en minimalistiese tema.

Ons is baie eenvoudige mense, en dit het deurgeskemer in ons dekor. ’n Paar blomme en kerse hier en daar het die atmosfeer gesellig en warm gemaak. My dierbare tannie het met soveel liefde en sorg die tafels vir die onthaal gedek, en dit was presies soos ons dit wou hê – elegant, maar ongekompliseerd.

Die dag self was gevul met spesiale oomblikke, maar een van die kosbaarste herinneringe was dat my pa die eer gehad het om ons seremonie te lei. Dit was ’n seëning wat vir ons albei baie beteken het. Marko het almal behoorlik aan die lag gehad toe hy onverwags ’n klein trappie onder sy stoel uitgetrek het om dieselfde lengte as ek te wees vir ons eerste soen as man en vrou – ’n ligte, humoristiese oomblik wat ons troudag nóg meer uniek gemaak het.

Ons kan nie vir ’n beter dag gevra het nie. Elke detail, van begin tot einde, was vol liefde en genade. Ons is so dankbaar teenoor die Here vir hierdie kosbare dag en vir die huwelik waarmee Hy ons geseën het.