Dylan & Kristel Kotze - Troue van die Jaar

STORIE:

Na aande van ‘Eerste Dans’ oefen in die tuin, naamkaartjies sit en verf, troupamflet-ontwerp en ure se beplanning het alles uiteindelik op die 15de Maart 2025 bymekaar gekom. Ons troudag was alles en meer warvan ons al van matriek af gedroom het en ons is dankbaar dat ons dit met ons naastes kon deel.

Alhoewel ons troue op die oog af kon lyk asof dit ‘n standaard bruilof was met al die bekende elemente, was daar ‘n groot verkil – die dansbaan! My man Dylan is ‘n danser en het my al vir jare vertel oor al sy planne vir ons groot dag se danse. Ons gaste was vir ‘n oomblik stomgeslaan nadat ons ná ons elegante eerste dans as ‘n getroude paartjie dadelik die onthaal verlaat het, net om na ‘n paar minute met nuwe uitrustings die saal in te kom en ‘n energieke tweede dans uit te voer. Van daar af was die dansbaan nie net oop vir al die gaste nie, maar propvol oud en jonk wat hulle beste danspassies uitvoer!

Die bruid en strooimeisies het die bruidegom verras met ‘n dans, net vir die bruidegom en strooijonkers om daarna dieselfde te doen. Só het dit gegaan met klein ruskansies tussen in om te smul aan die heerlike kos wat bedien was, net om weer vinnog-vinnig op die dansbaan te wees met al ons vriende en familie. Teen die einde van die aand was ons skoene lankal uitgeskop en ons voete vodde. Na vele versoeke van “nog net een liedjie” het die dansbaan uiteindelik toegemaak en die aand tot ‘n einde gekom.

Rolling Waters het ons troudag uitsonders gemaak met hulle uitstekende dien. Ons blommeverskaffers, fotograaf en elke diensverskaffer het bygedra om ons prentjie ‘n realiteit te maak. Ons sal altyd dankbaar wees vir elke vriend, familielid en diensverskaffer wat betrokke was by ons spesiale dag.

Van twee verliefde tieners wat in matriek besluit het om uit te gaan, tot agt jaar later wat daar amptelik “ja” gesê was vir ‘n ewigheid saam is ons troudag die hoogtepunt van ons lewens saam.