Elzanne & Dirk Oosthuizen - Troue van die Jaar

STORIE:

Die Here spesialiseer in tweede kanse en dis wat ons gekry het. Die grootste dag waarvoor ons ons lewe lank gewag het, deur al die op en af oomblikke om te beloof om dit te maak werk en Sy naam te verheerlik. Sy tydsberekenking is perfek en ons is uiteindelik by wie ons moet wees. Ons het baie geleer en gegroei en nou kan ons mekaar dien, in liefde.

Ons troubeplanning was taamlik vinnig. Ek het ‘n troue beplan in 3maande. Ons wou nie lank verloof wees nie en het dus onmiddellik proaktief begin optree na die verlowing. Einde Januarie was die groot vraag gevra en einde April het ons as een voor God gestaan.

Ek wou super graag ‘n halternek rok dra. Dit was nie maklik om te kry nie. Ek het so semi op ‘n ander rok besluit toe ek een aand op Binnelanders sien Tracy trou in my droomrok. Ek het die ontwerper se naam neergeskryf toe hul al die name laat rol aan die einde van die episode en haar gekontak om te hoor of ek die rok kan huur. ‘n Week later vlieg ek Johannesburg toe om te gaan pas. Soos ‘n handskoen. En een week voor die troue koerier sy die rok vir my. Soos ‘n droom wat waar word.

My aanstaande was redelik maklik met sy troupak en nie vol fiemies nie. Solank dit stylvol lyk. Woolworths se pak het hom baie aantreklik laat lyk.

Ons wou ‘n venue hê wat warm is, klein genoeg sodat ons 60 gaste nie verlore sal raak nie. Ek het gesoek na mooi landskap, iets anders (die woud gedeelte waar ons getroud is). Die buite canape area was eg Toskaans. Die saal het ‘n groot venster agter die bruidstafel gehad wat op die wingerde uitgekyk het. Prentjiemooi!

Ons dekor was elegant, stylvol en minimalisties. Alles wat wit en swart, net genoeg blomme, kerse en liggies. Almal het ook swart aangetrek en dit was soos hul sê ‘less is so much more’!

Iets spesiaal wat ek laat doen het is om vir my man ‘n opname te maak waarvan hy nie geweet het nie en dit het gespeel voor ek ingestap het. Ons het ook voor die tyd ontmoet sonder om te ontmoet, om ‘n hoek, hande vasgehou en saam gebid.