Ben & Elné Jacobs - Troue van die Jaar

STORIE:

Ons liefdesverhaal het een somervakansie in Hartenbos begin. Covid het gemaak dat ons mekaar oor die foon beter leer ken, maar ons albei was vasberade om die verhouding in iets mooi te laat groei. Alhoewel ons al ‘n paar klippe saam gekou het, kon niks in ons pad staan teen die liefde wat ons vir mekaar het nie. So ja, toe val Ben op sy knie, en geskiedenis word gemaak.
Trouvoorbereiding was ‘n voltydse werk, maar niks sou moontlik gewees het as Jeanine Beukes (skoonsussie), nie ingegryp het nie. Sy is letterlik ‘n ystervrou! Al was daar n paar goed wat in die pad gestaan het, het ons duisende stories om na terug te kan kyk en te lag daaroor.
My trourok is gemaak deur my ma. Presies uitgeknip soos ek dit wou hê en hoe spesiaal is dit nie?! Tydloos en elegant.
Die venue was weggesteek in die platteland — ‘n perfekte mengsel van plaas-sjarme en tydlose elegansie. Oop velde het om ons gestrek, sagte lig het deur die bome gefiltreer, en alles het kalm en gegrond gevoel. Dit het my in elke opsig weerspieël.
Vir die dekor het ek iets skoon, elegant en tydloos voorgestel – ‘n ruimte wat vreedsaam en vol liefde gevoel het. My hart was op alles wit gestel: wit tafellinne, wit blomme en sagte wit kerse wat saggies deur die aand geflikker het.
Wat hierdie dag vir ons spesiaal gemaak het, was dat almal altyd ingegryp het as iets skeef geloop het. Die vorige aand was n handjie geleen om waterbottel stickers te plak, en ons het natuurlik n braai daarvan gemaak. Dit was vir ons baie spesiaal om natuurlik die mense vir wie ons die liefste is, by ons troue te hê en elke oomblik saam met ons te vier.
Maar die oomblik wat dit vir my verseël het? Ons eerste dans. Ben het my opgetel en my rondgedraai asof ek lig soos ‘n veer was. Op daardie oomblik het ek in sy oë gekyk en gedink: dit is my ewigheid.