Helger & Catelen Pretorius - Troue van die Jaar

STORIE:

21 Maart 2024 sal vir ewig vir my ‘n spesiale datum wees.
‘n Doodgewone vakansiedag wat ons rustigs saam spandeer het.
Na ‘n verhouding van ongeveer 1 jaar het Helger op hierdie dag die spesiale vraag gevra, ek kon natuurlik nie wag om ja te sê nie. Ons ware liefdesverhaal het begin met hierdie epiese hoofstuk.

Vir die volgende 11 maande het ons beplan vir ons troue op 8 Februarie 2025.

Eerste op ons prioriteitslys was die venue.
Ons het albei ons harte verloor op Oranje Gasteplaas in die hartjie van die Oos-Vrystaat tussen die berge en asemrowende natuurskoon.

Elsa Corbett, Troubeplanner van Oranje, Ekself en my Ma het dadelik aan die werk gespring met die beplanning.

Met Neutrale kleure, onbeskryflike mooi blomme in wit, beige, room & bruin het ons ‘n romantiese Franse styl geskep.
Kristal en Kerse het verder bygedra tot die romantiese en rustige atmosfeer.

Helger se troupak is ‘n AG Boss.
My perfek gemaakte trourok deur Casper Bosman het al my verwagtinge oortref.
Die spierwit rok was gekenmerk deur ingewikkelde, gedrapeerde detail met ‘n “sweetheart” halslyn en wye romp gedeelte.
‘n Baie prominente “meringue” enkelmou was treffend met ‘n kaal skouer aan die anderkant.
Die ontelbare ure se hand-kralewerk op die korset is ten volle sigbaar gewees in my asemrowende tweede rok.
Agter elke skepping deur Casper Bosman is ‘n magiese reis gedefinieer deur verbeelding en vakmanskap. ‘n Oomblik van egte elegansie het vir my waar geword toe elke detail saamgekom het in perfekte harmonie, uitgebeeld in my droomrok.

Ons ongekompliseerde verhouding met mekaar, om mekaar eerste te stel & God as hoof van ons huis te hê is vir ons baie spesiaal in ons huwelik.